上流滙
調經兼醫脊椎 郭晶晶全力穀 B
2012年11月16日
豪門婚事，值得大事鋪張，不過大家期待已久，霍啟剛和郭晶晶這場世紀婚事，似乎誇張過龍。上月初先在郭晶晶家鄉河北保定區接新娘擺酒，上周六（ 10日）則南移到南沙宴請強國猛人，周日（ 11日）再壓軸於會展筵開百五席盛宴，誇張過巡迴演唱會。這場耗資幾千萬的大龍鳳終於完結，郭晶晶由國寶榮升做闊太。不過要在霍家站得穩，大前提當然是為霍家繼後香燈。
談到生兒育女，今年 33歲的霍啟剛曾透露：「我 哋都鍾意小朋友，一切順其自然，雙方家庭都冇俾壓力，只希望我 哋生活愉快。」話雖如此，原來兩親家早已各自發功，全力催穀「剛晶」造人。
名醫治脊椎
霍啟剛是霍家大仔，所以老竇霍震霆恨抱孫恨到出面。周日（ 11日），他於這場婚事的最後一個婚宴，當住過千賓客，開到口催新人生 B︰「婚禮後，希望佢 哋唔好再拖拉，趕快為霍家添丁啦！」但生仔始終並非一時三刻搞掂，郭晶晶父母為了鞏固女兒於霍家地位，不惜狂煲湯水俾晶晶。知情人士說：「晶晶底子向來唔係太好，所以佢媽咪一直燉湯俾佢飲，希望晶晶嘅子宮回復女性應有嘅狀態，令經期正常番。」
有「跳水皇後」美譽的郭晶晶，童年已開始為國家効力，長年累月接受艱苦訓練外，其實她還長期服藥，減低出賽遇上經期的機會，搞到經期大亂。除此之外，晶晶為了國家，曾患過胸膜炎和椎間盤突出，後者絕對影響她生仔的計劃。知情人士說：「晶晶嘅第三椎間盤突出，即係第三節脊椎移位，佗 BB條腰嘅負荷比一般孕婦重，所以啟剛之前已經帶晶晶去自己家庭醫生度做咗詳細檢查，仲話日後真係有 BB嗰陣，要每個禮拜做檢查至放心。」
學做港妻
縱然郭晶晶年前已憑「優才計劃」成為香港人，但由於她婚前還跟父母同住北京，對香港其實頗為陌生，早前她就向伏明霞取經學做港妻。知情人士說：「晶晶婚後入住霍家大宅，司機助手任用。但晶晶都想喺香港有自己生活圈子，於是叫伏明霞介紹咗一班闊太朋友俾佢識。」據知晶晶穀 B期間，會進修語言、藝術創作等幾個不同課程，希望完成造人大計後，可以發展藝術事業。
嚇人賓客
「剛晶」大婚，衣香鬢影。不過並非個個賓客都大方得體。
成龍追女
成龍以招牌動作影完相後，一見傅明憲單拖上電梯，便立即「衝！前！去！」追住打招呼。
超盈過露
擁有強烈自我風格的何超盈，當晚著住大露背晚裝到場，搞到個 bra前後都露，唔夠大方喎！
