娛聞樂
行股惑連環睇樓 恨嫁官恩娜千萬貼老外
2012年11月16日
上周除了盛傳鄧梓峰和吳綺莉在元朗被警員斷正「車震」外，同為《雷霆掃毒》的官恩娜（ Ella）亦被指是疑似女主角之一，事後她大叫無辜：「無理由因為我住新界就懷疑我，我有男朋友 㗎！唔會做對唔住佢 嘅事。」
事實上，官恩娜與拍拖三年的混血醫生 Juan打風打唔甩，偷食機會真係微乎其微。上周三（ 7日），本刊更發現官恩娜在地產經紀陪同下四出睇樓，全部都係過千萬的低密度豪宅。事後她向記者承認正物色港島區單位自住，不過強調「我係用自己錢買樓，你 哋唔好寫我買 嚟結婚喎！」收到！唔係咁快結婚，不過買定等嫁 啫！
今年 9月中，本刊率先報道官恩娜帶混血醫生男友 Juan返回上水雞嶺村三層高村屋，與官家上下一齊同居。二人拍拖三年，每次見面都甜如蜜糖，而且雙方已見曬家長，去到談婚論嫁階段。
已經 33歲的官恩娜，與混血醫生男友 Juan拍拖 3年感情穩定，早前被問到男友有否求婚，她笑曬表示：「千萬唔好求，我怕會 say no，我未感覺到佢有呢種舉動。」但原來她私底下已睇定待嫁屋。
專吼港島樓
官恩娜雖然否認短期內會結婚，其實她與男友早有共識。為築定愛巢，最近積極四出睇樓。「上年 Juan提過想今年結婚， Ella心大心細， 33歲年紀都唔細，屋企人都叫佢快 啲嫁人唔使再做。點知佢早幾個月簽 咗華納，公司要佢低調處理感情事，婚事亦只好押後再傾。不過 Ella見依家樓市有升冇跌，真係有心買定層樓保值，又可以有個地方俾佢哋過二人世界。 Juan喺中環返工，又冇揸車，下下搭地鐵或者要 Ella車佢，真係好唔方便。為 咗就男友，所以買樓都會揀港島區。」知情者說。
睇樓當日，官恩娜駕駛住自己的 Fiat座駕，接載經紀四圍去，睇足個多小時，離開時她笑笑口，堅稱自己不是結婚，買樓亦是自己錢。不過睇佢一提男友就甜到漏，相信結婚都快喇！
你哋唔好寫我結婚喎！（真實對白）
政府早前出招增加買樓附加稅打擊樓市，不過成效麻麻。官恩娜唔係炒家，又係香港居民，唔驚要俾貴稅。上周三（ 7日）下午 4時許，她在一男一女地產經紀陪同下，視察跑馬地藍塘道和大坑一帶的豪宅。
當日官恩娜身穿超短牛仔褲外披長針織外套，露出一雙白滑玉腿，其間大風一吹，不難見到她誘人股邊，前睇後睇都性感非常。睇樓期間，她非常留心經紀的講解，而她睇過的單位清一色是只有三、四層高的洋樓，單位面積全部過千呎，樓價亦全部過千萬。對於家底不錯，父親在大溪地從事珠寶生意的官恩娜來說，可說是濕濕碎。
專揀低密度樓
官恩娜所揀的屋苑是低密度，最高三、四層的大廈，貪其實用率高兼夥數少，私隱度較高。
官：用自己錢買樓
在大坑睇樓途中，官恩娜發現本刊記者即尷尬傻笑，睇完樓出來才停低接受訪問。劈頭第一句是叫記者不要寫她就快結婚，不過說時忍不住甜笑，似乎並非心嗰句，「你 哋唔好寫我結婚喎！總之 100%唔係啦！（點解唔見男友同你一齊睇樓？）總之我唔係買樓結婚啦！我用自己錢買 㗎！唔關佢事，自住或者當係投資囉！（依家睇中邊個單位？）都係睇曬先決定啦！」官恩娜呢位女朋友，唔止出曬錢，仲唔使男友操心，真係抵錫！
大溪地富家女
大溪地出生的官恩娜，自小萬千寵愛，父親官有權在大溪地及大陸從事黑珍珠及翡翠等批發生意，在大陸更開設了多間貿易及珠寶公司，其中一間「恩娜珠寶」更以愛女的中文名命名，他亦曾任香港多間商會會長及幹事。
有指官恩娜 04年由模特兒轉型做歌手，推出首張唱片《 Original》，就得到老竇在背後出錢出力支持，因而得到頂級音樂人林夕、陳輝揚及黃貫中等人幫手製作。
近年官家部分的生意已交由官恩娜哥哥官仲銘打理，而她的伯父官煌則是物業公司老闆。官氏家族全是生意人，難怪官恩娜水頭充足，買千萬豪宅都冇手軟啦！
