滾熱辣
成語對白氾濫 玩起《太監》演員 米雪：我死背㗎咋
2012年11月16日
縱然網友投訴黎耀祥版本的李連英陽剛味濃，又有人質疑劇情違背歷史，指李連英獲慈禧賞識前應叫李進喜，但無損台慶劇《大太監》的強勁氣勢，首周平均收視 31點，近年罕見。
網友雞蛋裏挑骨頭，其實《大》算是製作嚴謹，由九位編劇打造的對白字字珠璣，集集出現艱深成語，唔係個個家庭觀眾識解。
成語對白氾濫，亦搞到一眾演員爆頭。飾演慈禧的米雪，鏡頭前出口成文，但其實並非句句成語識得解，「我全靠死背㗎咋！」
《大太監》有戲味，不過對白零舍繞口，飾演慈禧的米雪，幾乎每集都要講幾個深奧的成語，例如「桀驁不馴」、「防微杜漸」等，文化水平不高的觀眾，分分鐘純粹靠劇情推測意思。
成語 1 防微杜漸
意思
「防微杜漸」意謂防患於未然、未雨綢繆。
典故
出自《後漢書》。當時東漢和帝在位期間，太後專權。於是大臣丁鴻上書叫和帝「防微杜漸」，小心太後橫行宮中。
成語 2 桀驁不馴
意思
形容人性格我行我素，難以馴服。「桀」讀作傑，「驁」讀作傲。
典故
出自《漢書•匈奴傳贊》，指罵外族人生性狂妄。
片場鴉雀無聲
為演好戲，米雪直言拍攝前不停查字典，成語典故唔明唔緊要，最重要讀音正確。她皺住眉頭說：「真係好鬼多四字詞，好彩監製早俾劇本我，等我可以之前做定功課。我全靠死背㗎咋，不過我咁流利講咗出嚟真係好有成就感。」
與米雪最多對手戲的張國強亦戥米雪陰功，「拍呢套劇好辛苦，我好多都唔識讀。米雪講得最多，佢最慘！」唔識最緊要問，邵美琪就說：「我成日都要問監製羅永賢，又叫佢俾本字典我查。我自己都要死鋤爛鋤，先記得啲讀音。以前拍劇，大家同事都鍾意傾偈，但拍呢套就好靜，原來個個演員不停做功課記發音。」
成語 3 一抔黃土
意思
可解作墳墓，後來引申至微不足道的意思。「抔」讀作（ pɐ u，粵音第四聲）。
典故
記載於《史記•張釋之列傳》。當時張釋以「一抔黃土」形容先帝的墳墓。
成語 4 桑榆暮景
意思
人晚年時的自我感嘆，慨嘆無法追回昔日光景。
典故
出自曹植五言詩《贈白馬王彪》其中兩句「年在桑榆間，影響不能追。」
成語 5 三省吾身
意思
每日不忘自我檢討做人處事有否出錯。「省」讀作醒。
典故
出自《論語》。當時孔子教導學生每日自省，並力求改進，減少缺點。
靠 apps學發音
拍劇期間，監製羅永賢長期為演員解決對白問題，周身唔得閒。部分演員費事煩到監製，於是自發性下載「真人發聲」 apps至手機，靠 apps學成語發音。 apps用家曹永廉則說：「 apps幫到手，不過啲字唔生活化，讀音真係好難。有次拍到淩晨三點幾，講極都講唔到。」而陳國邦拍攝時亦長期帶定 iPad傍身，隨時 㩒發音，他說：「我一向都鍾意歷史，成日都睇相關嘅書籍，但都唔會識曬，靠 apps學發音囉！」
《大》劇本由九位編劇合力炮製，但所有包含成語的對白均出自編審關頌玲。監製羅永賢說：「關頌玲好犀利，鍾意睇好多史書。不過廣東話太多音，錯咗好難避免，希望觀眾體諒。好似『一坯黃土』，個個都將坯讀杯字，其實讀（ pɐ u）字，所以要重新配音。」不過記者翻查由「江蘇人民出版社」的《成語詞典》正確寫法應該是「一抔黃土」。連監製都搞錯，證明對白真係太過難喇！
記者下載演員推薦的「真人發聲」程式，並輸入「一坯黃土」，但內置聲帶卻讀出「一（杯）黃土」。記者之後再輸入正確寫法「抔」字，才出現監製口中正確的讀音，所以「抔」字先啱。
成語大測試
《大太監》對白過分深奧，搞到演員苦不堪言。本刊將其中五個《大》劇出現的成語，測試無綫一班老中青藝員，結果個個玩到皺曬眉。
劉丹：多餘
拍過不少古裝劇的資深演員劉丹，五個成語中有四個識讀識解，當中「一抔黃土」中「抔」字讀音就令他大發雷霆，他說：「唔係讀『披』字咩！真係好鬼多餘，好似索償個索字咁，依家又讀殺！」
JJ：唔識解呀！
鄉音未改的賈曉晨（ JJ）要求用普通話讀出五個成語，結果全中。不過她就識讀唔識解，其中「三省吾身」錯得最離譜，她說：「真係唔識解呀！意思係咪瞓醒咗都唔肯起身呀！」簡直笑爆肚。
古明華：以前邊有呢啲對白！
曾於無綫配音部工作，替不少內地古裝劇配音的古明華（蘇基），只答中「三省吾身」，他說：「我都唔知自己咁差，雖然拍過唔少古裝，但以前邊有咁多呢啲對白！」
周麗淇：我睇歷史書㗎！
眾多演員中，周麗淇是唯一能夠正確解釋五個成語的演員，她說：「真係好深，不過我睇好多歷史書㗎！」估佢唔到。
下周高潮 黃浩然對住陳茵媺脫褲
全城熱捧《大太監》，本刊亦搶先披露下周第 12至 16集劇情，堪稱全港最快。下周高潮位，莫過於太監之一、後來效力禦藥房的黃浩然，為令公主陳茵媺對他死心，決定剝褲力證自己冇咗子孫根。
離宮作樂
陳茵媺下周愈愛愈深，經常帶埋黃浩然偷出宮，一齊遊山玩水，她更主動出擊叫黃從後攬實自己。
力證無根
西太後米雪下令棒打鴛鴦，命黃浩然諗計令陳茵媺死心，於是他衝入陳的房間剝褲。
拒睇真相
陳茵媺其實一早已知黃浩然係太監，不過她愛得不能自拔，擰歪面唔肯睇黃的下身，拒絕接受現實，之後二人更會私奔。
祥哥定欣上牀
一齊出生入死的黎耀祥和胡定欣，下周搞到上牀，不過原來另有內情。
中鴉片毒
胡定欣情傾將軍李天翔，為了令李天翔搣甩鴉片毒癮，胡決定以身犯險服食鴉片，話要一齊戒。好蠢。
醉酒上牀
李天翔為了敲詐黎耀祥，灌醉黎和胡定欣，更搬他們上牀，搞到黎以為自己真係有汙辱胡定欣。
邵美琪毒米雪
東、西太後惡鬥一浪接一浪，為了奪取米雪霸權，邵美琪決定毒死米雪。
毒散送藥
米雪為政事搞到身體虛弱，邵美琪於是買通曹永廉，叫曹永廉於米雪的湯藥中落毒散。
最後事敗
可惜邵美琪最後心軟，正當米雪張開口之際，邵就一手將碗打爛，更隨口噏話苦藥無效，叫米雪唔好食。
無間報料
其實曹永廉是無間道，一早向米雪通風報訊，指邵美琪會落毒。米雪做這場大龍鳳，純粹試驗邵的狠心程度。
