大封面
錢嘉樂婚前 hea爆 大肚盈盈做阿四
2012年11月16日
踏入 11月，娛樂圈喜事停不了。繼霍啟剛在光棍節（ 11月 11日）娶得郭晶晶後，周二（ 13日），輪到 47歲的錢嘉樂和 37歲的湯盈盈，在海洋公園熊貓女「盈盈」見證下，註冊簽字結婚，可喜可賀。
拍拖 5年，湯盈盈任勞任怨，如今守得雲開成為錢太，實在得來不易。本刊連日追訪孭住 5個月巨肚的湯盈盈，發現她除獨自到機場接親戚外，亦多次頻撲睇樓，趕於 BB出世前入夥。註冊簽字當日，她更單拖揸車攞禮服回寶馬山花園娘家，新郎全程唔見影。今次箍得嘉樂歸，盈盈可謂苦盡甘來。
自從 8月宣布大肚後，湯盈盈為婚禮籌備忙個不停。雖然有好姊妹梁靖琪（ Toby）拍心口負責搵婚紗禮服、禮餅贊助、安排酒席等，但佗住蛇 B的湯盈盈仍親力親為，務求讓婚禮做得盡善盡美。
註冊日攞禮服
周二（ 13日）當日，是盈盈樂樂大婚之日，但早上 9時，本刊發現一身便服的湯盈盈離奇地獨自駕著 Benz座駕，返回北角寶馬山花園寓所，明顯她一早已外出。落車時，她身邊沒有助手之餘，挺住大肚的她更拿著一個「觀奇洋服」紙袋急步上樓，估計是新郎或湯父的禮服。
大肚盈盈冇人陪，相反一臉風騷的錢嘉樂，約兩小時後，才施施然步出西貢匡湖居寓所，乘坐已布置好的花車，由四架花車開路，浩浩蕩蕩由匡湖居出發，直往湯盈盈的寓所，會合好老婆，再齊齊出發到海洋公園舉行註冊儀式。
新娘子不單止在結婚當日要四圍撲，由於她大部分親戚都在加拿大居住，近日她亦不時出入機場，接送他們到酒店住宿。知情者透露：「盈盈親戚好少嚟香港，佢好緊張，大住個肚都堅持要去機場接佢哋，但次次嘉樂仔都唔見人，要大肚婆騰出騰入，我哋班姊妹都戥盈盈擔心。」
10/10頻撲睇樓
曾被拍得睇西半山貴樓的湯盈盈，在雙十節當日，單拖與地產經紀轉睇九龍區豪宅。雖然錢嘉樂講明買樓 budget係千五萬左右，但盈盈所睇的樓全部唔過呢個數，可見盈盈有心慳老公仔荷包。
名校區睇樓
錢嘉樂對婚禮籌備事宜咁 hea，其實他近日正為劉德華投資的新戲《風暴》做武指，落力搵奶粉錢，湯盈盈要獨自籌備婚禮都無可厚非。本刊早於一個月前開始追訪盈盈，發現她還要抽時間到港九新界睇樓，揀選合適的安樂窩，但錢嘉樂一樣冇蒲過頭。
當日（ 10月 10日），她與地產經紀一口氣睇勻大埔道赫德傑山、爾登豪庭、九龍塘碧麗閣和何文田帝景園等千五萬以上豪宅。據其好友透露：「盈盈覺得依家有咗小朋友，住市區會較方便，佢揀九龍塘同何文田啲屋，無非為 BB讀書鋪路。」
國寶唔領情
有別於其他藝人低調完婚，今次盈盈樂樂的婚禮與眾同樂，破天荒在海洋公園亞洲動物天地註冊簽字，由 7歲熊貓女「盈盈」在欄內全程見證。
周二（ 13日）中午約一時，一對新人的親戚及兄弟姊妹等約 50人，魚貫由側門進入展館，之後輪到換上婚紗的湯盈盈，與身穿禮服的錢嘉樂壓軸進場。婚禮進行時，職員只封閉「盈盈」的半個「寓所」供一對新人註冊，其他遊人仍可由另一邊隔住玻璃觀看整個過程。其間唔少人爭相高舉相機拍照，更有內地遊客高叫：「盈盈好幸福！」
現場所見，職員將數個刻了囍字的大南瓜放在國寶「盈盈」的木椅上。不過調皮「盈盈」卻未領情，在儀式進行時，竟然一手將兩個大南瓜掃落地，然後一屁股「得」在大石上，自顧自吃竹葉。所謂見證，明顯只為搞搞綽頭而已。
熊貓二缺一錢母埋怨
據知海洋公園原定安排兩隻熊貓「盈盈」、「樂樂」為湯盈盈及錢嘉樂作見證，寓意一雙一對，最後卻僅安排熊貓女「盈盈」單拖上陣，意頭麻麻。不過，一對新人坦言百無禁忌，湯盈盈亦甜爆表示：「我有呢個樂樂已經好開心。」
反而錢嘉樂的家姐 Cecilia及其母，對於只有單丁一隻熊貓卻甚有微言。 Cecilia向本刊說：「我都有問過公園職員，不過得『盈盈』一隻係失望嘅！」而錢母亦說：「有啲失望，始終喜慶事，但呢啲嘢好難預料嘅！」
樂樂大細超
盈盈樂樂在海洋公園註冊成正式夫妻後，本周四（ 15日）晚，兩人移師到尖沙嘴洲際酒店擺酒，婚宴搞手梁靖琪透露：「盈盈鍾意花，當日會場布置會以花為題，顏色以粉紅、白及紫色做主調，夠曬浪漫。」而菜單安排方面，湯盈盈表示：「我唔食翅嘅，所以菜單上唔會有翅，但有蟹同鮑魚。」
至於賓客名單，錢嘉樂明言：「電影嗰班我會請曬嚟， TVB嗰班就請代表囉，每個部門請啲，服裝間啲梳頭阿姐都有請㗎。咁梗係要搵靚仔靚女充撐場面，有啲合作咗幾次，高 Ling、 Gigi姐、汪阿姐都有請。（香香呢？）有叫，唔叫就會俾人話身有屎。（咁李珊珊呢？）呢個唔方便啦！始終都尷尬。」煲水女友唔怕請，請舊愛就變踩場，錢嘉樂又點會唔知！
婚禮開支 184萬
本周四（ 15日），錢嘉樂和湯盈盈移師洲際酒店擺 56圍，每圍$17,988，加埋租借 ballroom及酒水，開支約 180萬，加上在海洋公園的註冊儀式及招待約 60位親友在大熊貓餐廳的午膳，約$45,000支出，整個婚禮總支出約 184萬。兩日加埋使近 200萬，樂樂又要努力搵銀囉！
海洋公園註冊支出 約 4.5萬
婚宴場地 約 55萬
酒席
（ 17,988× 56圍+10%服務費） 約 110萬
酒水（ 2,380× 56圍+10%服務費） 約 14.6萬
總支出約 184萬
無翅菜單
由於湯盈盈極力反對食翅，所以婚禮在宣揚無翅婚宴的洲際酒店舉行。據知菜單會以湯盈盈提及的蟹作主菜，另外還有佛跳牆、鮮鮑魚等九道名貴菜式。
