真面目
睇錢份上 $500人情港女真面目 日使$73慳到盡
2012年11月14日「畀 500蚊人情就不要來」成為上週城中話題，一名準備於年底結婚的港女在 facebook回覆「貧友」時說，在五星級酒店食自助餐擺酒人情起碼八嚿，只畀$500，絕交都似！
留言一出即引發激烈討論，港女遭網友狂插貪錢兼勢利外，更隨即瘋狂起底，連港女的舊男友照亦一併抄出，甚至有人冒認港女於高登討論區留言稱要控告網友。本刊發現原來$500人情港女極為慳家，返放工船車加埋開餐都只係盛惠$73。週一放工時更向本刊擰頭澄清沒有留言告高登仔！網友放人一馬啦！
出事留言
上週一（ 5日）， 500港女的留言在網上瘋傳，事隔一週網友仍樂此不疲討論，高登已開到 22帖，超過 2萬留言。
500蚊港女事件聲討一週後，港女除極速刪掉 facebook戶口外，亦沒有再發表任何言論，反而她的未婚夫則出面在高登和報章為她護航，力證未婚妻非貪錢女人。
全程口罩
變成網友公敵， 500港女返工出街都怕俾人認出，無論返工定行街都戴住口罩，除咗食飯之外真係好難見到佢真面目。成為網絡紅人後， 500港女身心受壓，就算戴住口罩仍難掩倦容。
雖然 500港女被網友指貪錢，但本刊發現她原來是慳妹一名。她平時衣著甚為樸素，少見跟同事外出用膳，放工後港女更甚少出動 shopping，反而直接過海等未婚夫放工，即使拍拖亦沒有外出用膳，寧願買麥當勞回家開餐，粗略計算 500港女一日使費（車、船交通費及一餐外賣）只用了$73，認真節儉。
情深拖實
500港女收工後直接去搵未婚夫， 2人行街時全程拖實，大婚在即分外溫馨！
麥記外賣
行完街， 2人便到附近的麥記買晚餐，不過佢哋只係買咗一份套餐，又慳又可婚前減肥，一舉兩得。
坐船返家
連晚餐都買埋， 2人到碼頭上船返家，不過未婚夫就因為講緊電話而冇拖住未婚妻。
擰頭否認告高登
網上有自稱 500港女的網友留言聲言要控告高登仔，但週一（ 12日），她卻擰頭否認其事，再問到她是否需要平反時，她禮貌回應：「多謝關心！唔使喇！」
「多謝關心」
明明係待嫁幸福少女，忽然變新聞人物，港女自然備受壓力，但難得 500港女 EQ甚高，如常開工。
本週一（ 12日）本刊欲親身訪問 500港女，問到她遭網友圍插一事時，她只平靜回應：「唔好意思，我唔答㗎啦！」問及早前從疑似 500港女 facebook流出的反高登仔留言時， 500港女只擰頭否認有做過，其後扮傾電話，再沒理會記者提問。至收工時，本刊再問她是否需要平反時，港女說：「多謝關心！唔使喇！」 500港女都笠曬水，網民係時候收手喇！
未婚夫做保鏢
眼見未婚妻俾網友圍攻，未婚夫亦於上週一（ 5日）公開留言，力撐未婚妻為人，更稱網上流言全屬虛構。加上未婚夫每日管送返屋企，保護未婚妻程度有如保鏢。
五點聲明
受網民言語攻擊， 500港女當然唔好受，未婚夫則代妻向公眾道歉之餘，更不忘列出 5點撐愛妻。
1.無中生有
2.飽受騷擾
3.持家有道
4.求饒放生
5.婚期不改
人情好難計
500港女事件熱爆全城，但男方堅持會如期擺酒，一於懶理聲稱會踩場贈興的高登仔；而娛樂圈唔少新婚或已婚夫婦對於此事各有唔同見解， Toby梁靖琪仲話港女未必錯曬添！
錢嘉樂 開心要緊
錢嘉樂本月 13日大婚，嘉樂仔就話：「每個人都有唔同諗法，要揀自己負擔得起嘅地方擺，不過最緊要開心。」
梁靖琪 計過數先
Toby梁靖琪做 wedding planner，當然對酒席價錢好清楚， Toby表示：「我做呢行實知價錢啦，我去飲都會計番圍酒幾錢再做人情，佢（ 500港女）處理得唔好啫！」
呂慧儀 唔知禮金
長腳蟹呂慧儀話 500港女有言論自由，佢回應時說：「擺酒都係請朋友食餐飯，幾多錢冇所謂嘅，而且禮金我都唔知有幾多㗎！」
