探熱針
斬草除根 錢國偉野蠻正印 趕絕白雲
2012年10月25日錢國偉（ Wilson）惡搞韓國 PSY，港版《江南 Style》熱爆，以前合作過的「美味天使」，亦幾乎個個有份登場，唯有與他傳過緋聞的白雲唔見影。事緣錢國偉女友陳宛蔚打爛醋埕，唔准男友再用白雲，更警告其他天使，別再挑戰她的正印地位，否則無運行。
被斷米路，白雲於是重返校園專心讀書，靠自己搵出路。
鬧埋白雲男友
去年六月，錢國偉拉大隊到新加坡拍《五覺大戰》，鬧出拖女上房的緋聞，牽涉其中的白雲，之後再被拍到餵錢國偉食雪糕，結果辣㷫正印陳宛蔚（ Calinda），野蠻女友上身，日日家嘈屋閉。「 Wilson講對唔住都搞唔掂，搵埋白雲同佢男朋友親自喺電話度同 Calinda解釋，點知佢連人哋男朋友都鬧埋，即使佢信 Wilson同白雲冇嘢，但 Calinda覺得好冇面，唔做嘢唔得。」知情人士透露。
往後，即使只是白雲見報，陳宛蔚都會「病發」，打電話加 whatsapp鬧爆白雲，又講到明如果容忍白雲的所作所為，將來會有更多「閒雜女子」挑戰她，陳宛蔚還警告說：「我知你會明白我嘅意思，我一定要好好保護自己。」
女友全天候開火，不但要 Wilson在邵氏高層、契爺黃家禧面前公開斟茶認錯，更正式下旨，不可再與白雲有任何合作，連早已定好的工作計劃，亦即時喊停，野蠻女友上曬身。
叮走小花有前科
事實上，陳宛蔚踢走錢國偉身邊小花早有前科。電影《喜愛夜蒲 2》原本由苟芸慧做女主角，陳宛蔚覺得對方「來意不善」，為免受到威脅，於是逼男友換人。惡搞韓國 PSY後， Wilson人氣急升，陳宛蔚更變本加厲，幾乎去到邊跟到邊，開工一樣跟到實，示威兼杜絕再有女埋身。
「 Wilson同 Calinda拍咗拖差不多六年，落難嘅時候， Calinda都冇離開佢，所以 Wilson對女友好忍讓。」知情者說。
失去錢國偉射住，白雲靠拍無綫劇做閒角和出席活動，收入極有限。「佢冇怪 Wilson，亦都知道佢難做，好在有男朋友支持，咪俾心機讀完大學先，將來如果冇得做幕前，咪試嚇幕後囉！」
得六萬獎學金
上週三（十月十七日）早上，身穿黑色連身裙、白色針織外套的白雲，抱著文件夾現身位於何文田的香港公開大學，直走上校舍二樓課室上堂，到下午六時始離開。據了解，她目前修讀公開大學「電影藝術及編劇」雙學位學士課程，還有一年便畢業。「佢前兩年啲成績好好，學校俾咗六萬幾蚊獎學金佢，啱啱夠俾埋啲學費，加埋有兼職補習普通話，生活唔成問題。」知情者說。
對於 whatsapp鬧爆白雲，陳宛蔚說：「我同佢係有 whatsapp，冇話滿唔滿意佢啲乜嘢事， Wilson用乜嘢人係佢自己決定，覺得唔啱咪唔用囉！」她還辯稱惡搞 PSY的 MV需要長腿美女，白雲身材比較豐滿不合用，男友亦未必次次搵她做 job。
天使爸爸
自無綫遊戲節目《美味廚房》，令籍籍無名的天使妹 JJ賈曉晨彈出後，監製錢國偉不斷好橋重用，即使離開電視台出外拍戲做騷搵食，亦與一班天使妹為伍，有人做盲公竹，靠曬身材的天使妹，自然唔介意黐住她們口中的「爸爸」夜蒲搵機會，互惠互利。
神獸天使之一白雲，憑住 36E巨胸殺出，另一神獸蔡慧欣，亦因跟金剛傳緋聞，拍住上出活動搵銀。
