霆鋒：我完全康復
32歲的謝霆鋒驚爆患皮膚癌！09前他拍電影《十月圍城》時發現左耳對上有粒痣，3年後變得越大越黑兼有根，醫生指是Melanoma（黑色素瘤），上月霆鋒入院割除縫了五針，昨日他由父親謝賢陪同由北京返港，刻意戴帽遮掩手術後的傷口，並強調已完全康復。霆鋒又表示已告訴前妻張栢芝患癌一事，栢芝更笑說「個天唔會畀衰人咁快死！」似乎她仍對霆鋒又愛又恨！
去年謝霆鋒才結束與張栢芝的五年夫妻情，失去愛情和婚姻的他，原來也經歷了嚴峻難關，3年前他鏟青拍電影《十月圍城》時，發現左邊頭皮有粒痣，前年他再鏟青拍《綫人》，這粒痣竟跟著歲月增長，變得更黑更大，原來這痣是會害他失去性命的的皮膚癌！《十月圍城》令霆鋒在金像獎、金馬獎、亞洲電影大獎狂掃三個最佳男配角，《綫人》更令霆鋒封影帝，這兩部戲為霆鋒帶來榮譽，估不到更見證了黑色素瘤的惡化。
霆鋒前晚在節目中驚爆患皮膚癌。
【08年黑印初現】當年淫照風暴後，鋒芝從泰國返港，當時霆鋒的左邊頭顱上已驚現黑色素瘤。
【09年剷青現瘤】霆鋒當年拍《十月圍城》，黑印（箭嘴示）似一粒黑瓜子般大。
【前年越大越凸】前年霆鋒拍《綫人》，黑印變得更大更黑，明顯惡化了。
「醫生話係Melanoma」
前晚無綫播出節目《最佳男主角》訪問霆鋒的壓軸篇，他跟主持黎芷珊驚爆這個秘密：「冇乜人知，不過我係好番，所以唔好聽到大驚小怪，嚇親鄉親父老。」剪了skin head的他指著左邊頭顱自爆疑患皮膚癌：「感謝上天！最近我無喇喇剪短頭髮，其實我呢度有粒瘤，一個黑色嘅印，已經有咗成三年。」霆鋒懵然不知頭皮上有黑印，幸經理人霍汶希（Mani）發現，他說：「拍《十月圍城》時Mani同我講：『仔，你嗰撻嘢好似唔係好健康，去睇醫生。』但我冇理，最近再剪短頭髮，佢話黑影大咗好多，捉我睇醫生，如果冇事，用激光電一電就OK，醫生一睇話sorry電唔到，再摸一摸話已經有根，係Melanoma嚟，我話唔明，佢好隱晦用電腦打呢個字，出嚟寫住skin cancer（皮膚癌），我……哦！」
黎芷珊驚聞霆鋒患癌，嚇到O嘴，霆鋒續說：「所以你嗰日打畀表哥（霆鋒助手）度今日嘅期，其實我喺養和切緊嗰塊嘢出嚟，家有五針喺度，幸運地我係短頭髮，畀人見到佢係大緊，如果我係長頭髮大到咁……」霆鋒做出拳頭手勢，搖頭說：「我諗冇，我唔知，就算切出嚟條疤係咁長，家有頭髮遮住OK，但仲未拆線。」芷珊問霆鋒當時驚唔驚？他說：「我媽陪我，佢驚，爸爸唔知，前幾日英皇活動我都戴帽，唔想解釋，家等化驗，我估唔到可以切咁大粒嘢出嚟，人生又多個體驗，人係咁脆弱，如果天畀我咁無厘頭剪短頭髮，睇到呢件事，就應該冇事，否則拜拜了。」
【上月中戴帽遮疤】9月霆鋒在養和做手術割瘤後出席英皇周年晚宴，要戴帽遮傷口。
【上月底割後留「空」】上月底霆鋒在北京演出，割瘤位置的頭髮仍未長回。
霆鋒昨日返港時戴帽遮手術疤痕，他強調已完全康復。
栢芝：衰人冇咁快死
霆鋒和父親謝賢昨日約6時由北京返抵香港，霆鋒戴黑超和cap帽，對於患皮膚癌一事，他說：「身體OK，做訪問已經冇事，唔知剪接變成點。」問是否戴帽遮傷口？他搖頭笑而不答，只說：「講咗好多次冇事，我完全康復，唔好大驚小怪，有事都唔會講啦。」霆鋒強調不需要再接受療程，他透露之前沒告訴四哥，但有告訴栢芝：「因為兩個仔，所以我有同前妻講，佢話唔使擔心，仲講笑話個天唔會畀衰人咁快死，佢好樂觀冇擔心。」至於跟霆鋒傳緋聞的車婉婉昨日剛巧和男友人返港，曾跟霆鋒合作拍《十月圍城》的甄子丹則到機場接老婆機。
入行多年的霆鋒，每次拍動作戲都搵命博，搞到身體五癆七傷，他曾說：「醫生同我講過，我35歲後需要搵人扶，因為我啲舊患，全身嘅骨頭關節，29歲開始風濕，起身要搵人扶，雖然哮喘有好轉，但其他體能已經超越45歲以上，因為斷同爛撞得太多。」雖然霆鋒現在做了手術，但不知會否復發，身為父親的謝賢昨日接受本報記者電話訪問說：「割咗啦，多謝你有心，不過佢冇話畀我聽。」問霆鋒是否出院才告訴他？謝賢說：「冇住院，割咗就走，好小事。」
霆鋒和四哥昨日由北京返港，四哥指兒子已做割除手術沒事了。
Mani：拍戲發覺大咗
至於霆鋒的救命恩人Mani，表示不用對方報答，因這是她的職責：「《十月圍城》時見佢有粒痣，黑色凸出比較危險，忠告佢幾次，但佢搏殺期冇睇醫生，最近拍新戲扮消防員要剪短頭髮，發覺大咗，醫生話易演變成癌症，拉姑陪佢做手術，霆鋒唔想咁多人擔心，冇講畀四哥知，佢好鎮定冇驚過，近期出咗報告，好在係良性唔係cancer，已經割咗唔使擔心。」
採訪：王崇穎 攝影：陳順楨
霍汶希在微博謂化驗報告證實是良性。
