真面目
似足老豆 溝葉熙祺掛住薛凱琪 大話房祖名𡁻完鬆
2012年10月24日出名花弗兼多女嘅房祖名，似足老豆成龍咁風流，不過玩女無數，終於失手。糾纏 3個月，房祖名與新晉宅男女神葉熙祺先被拍到在九龍塘大宅過夜，後又傳 2人閃婚，早前女方主動承認 2人戀情，估唔到見光即死。
最近葉熙祺到港宣傳新戲《天生愛情狂》，滿肚委屈向本刊堅稱自己無講大話。溝掂葉熙祺的房祖名，原來從未放低前女友 Fiona薛凱琪，老豆溝女有一手，優良 DNA點會冇遺傳？
斯斯文文，個樣呃得嚇人嘅房祖名，入行 8年，緋聞一大堆，不過你有你傳，房祖名例牌唔會認女友。
話冇同 Fiona拍拖
遺傳老豆成龍愛玩性格，房祖名溝女溝得雜，無論中日台妹都啱口味。
房祖名與 Fiona薛凱琪的戀情傳得最耐，雖然 2人早於 09年分手，但原來未斬纜，有指房祖名仍心掛掛 Fiona。最近主動爆料話同房祖名拍拖的葉熙祺，原籍廣東操流利粵語冇北味，雖然同房祖名只得 3個月貨仔，女方卻全心全意對男友，可惜男方鍾意一腳踏兩船的壞習慣始終戒唔甩。葉熙祺仍不忿說：「佢有叫過我去睇 Fiona演唱會，不過嗰時我喺北京唔得閒，我唔知佢有份做嘉賓囉！我曾經問過佢關於佢同阿 Fi（ Fiona）啲嘢，不過佢話無一齊，絕對無，咁我咪信佢囉！佢曾放佢同 Fiona嘅電影俾我睇，後來見到報道話阿 Fi因為佢抑鬱，我先知呢個人擘大眼講大話。」
拍拖探 E神
7月中，葉熙祺來港為《天生愛情狂》配音，房祖名就出動價值約 88萬嘅淩志跑車管接送，蒲完才去 Eason屋企開 P再玩過。「我嚟到香港啲朋友帶我去玩同食飯，嗰晚佢（房祖名）話帶我去朋友屋企玩囉！」圖片
「成」家人食飯
葉熙祺公開戀情，房祖名開微博鬧爆，指她不應牽涉其父母，葉熙祺委屈話自己從冇講大話。
F：《 FACE》 葉：葉熙祺
F：你真係見過成龍同林鳳嬌？
葉：係，我哋仲一齊食飯。第一次見係喺北京一個聚餐，當晚佢（房祖名）叫我去同佢阿爸阿媽食飯，點知去到成圍枱有十幾人，不過除咗房祖名一家外，我其他人都唔識，其實我哋唔只見過一次。
F：不過成龍話唔識你喎？
葉：無所謂啦！以後見到當見唔到囉！
F：有冇機會復合？
葉：機會好渺小，做番好朋友都好難。我成個心畀曬佢，前一秒仲好好哋， 𠵱家有天堂跌落地獄嘅感覺，我真係好後悔同佢開始。佢唔認都無辦法，我係講事實。
房氏優良傳統，葉熙祺當買個教訓囉！多人識咗，當賺啦！
《爆足一周》祖名口窒窒
週日（ 21日）《爆足一周》查小欣電話訪問房祖名和葉熙祺，雖然訪問經過剪接，但 2人依然答得模稜兩可，聽到觀眾一頭霧水，收視更慘情，再跌 3點，平均得番 14點。
娜姐師妹攻日
在內地有「可愛教主」之稱的葉熙祺， 09年以歌手身份出道，曾推出個人專輯《大眼睛》及《祺待》。年初與樂基兒拍資生堂洗頭水 Tsubaki廣告，成功打入日本，香港都有勁播。 6月份更登上日本銷量第一雜誌《 Can Cam》封面，成為該雜誌的禦用模特兒。
